Рецепти за супи и чорби (I дел)

0

Супата е стара колку и умешноста на готвењето. Всушност, супата потекнува уште од времето кога нашите далечни предци го вареле месото во казан на отворен оган. Со време, веројатно откриле дека супата е повкусна ако и се додаде некаква трева, претходничка на денешните ароматични растенија, зеленот и зеленчукот. Потомок на овие примитивни супи неоспорно е француската чорба „пот ау феу“, која постојано врие во лонец на тивок оган и во која се става с# што се има при рака: различни видови зеленчук, месо, коски.

Некогаш супата се сметала за лек, како на пример прочуената француска супа “ресторан” (од рестауер-закрепи), која во 16.век била на глас во Франција. Сопственикот на една тогашна крчма испишал над влезот “Рестаурант”, за на сите да им даде до знаење, дека кај него може да се најде оваа закрепнувачка супа. Така зборот “рестаурант” со време станал синоним за локал во кој се служат разни јадења.

Речиси секоја нација има некоја своја чорба, било од месо, зеленчук, житни растенија или теста. Чорбата во целиот свет со задоволство се јаде и се служи како прво или главно јадење, на кое му се посветува најголемо внимание.

Денешната супа, односно чорба има двојна улога: да го стимулира апетитот и да му ги даде на организмот потребните хранливи состојки. Затоа супата треба да се нагласи според другите јадења на еден оброк: ако се другите јадења обилни и заситуваат, треба да се јаде бистра, немрсна супа, која со својот мирис и вкус, ќе го поттикне апетитот за наредното јадење. Во спротивно супата треба да е појака.

ФРАНЦУСКА СУПА

Оваа супа е еден од најдобрите француски специјалитети. Почнала да се служи во Париз пред околу 130 години и тоа во земјен сад, во кој е приготвувана. Тој начин на служење, веднаш е прифатен со огромно воодушевување, а супата “петите мармите” влегла во мода во сите ресторани на стариот и новиот свет.

(За 12 лица): 1 кг. кртина од говедско месо, 1 исчистена и подготвена за варење кокошка, сол, 2 страка праз исечен на парчиња од 2-3 сантиметри, 2 моркова исечени на парчиња 2-3 сантиметри, 3 исецкани целери, ½ главица помала зелка исечена на парчиња, 2 каранфилчиња забодени во по една половинка излупена главичка кромид, ½ лажичка говедско сало или путер, ¼ лажиче свежо сомелен црн пипер, 1 китка ароматични растенија (1 ловоров лист, 8-10 страка магдонос), поголеми говедски коски, 1 лажиче зачин червил, двопек, изрендан ементалер.
Иако оваа супа се приготвува во земјен сад од 10 литри, може да се употреби и обичен емајлиран или алуминиумски лонец.

Се става говедското месо и кокошката во лонецот, се налева со вода, се посолува и се остава да зоврие. Се намалува температурата и се вари триипол до четири часа. Во текот на варењето се вади повремено пената. Кога говедското месо и кокошката ќе омекнат, се додава празот, морковот, целерот, зелката, кромидот (претходно испржен во сало или путер заедно со каранфилчињата). Се додава црниот пипер и китката ароматични растенија. Се проверува дали е супата доволно солена и се вари на тивко, уште половина час.

Се вади говедското и кокошката, се остава да се излади, па се сече на ситни парченца. Се враќа месото во лонецот и се вари и натаму на тивок оган уште еден час. Непосредно пред служење, се вади кромидот и ароматичните растенија. Се служи со двопек намачкан со мозокот од коските или со печен леб посипан со изрендан ементалер.

ГЕРМАНСКА ЧОРБА ОД КОМПИРИ

2 шолји компири исечени на коцкички, 1 мал морков исечен на тркалца, 1 мал целер исечен на ливчиња, 1 праз исечен на помали парченца, 1,5 л. бистра супа(може од концентрат), 1 лажиче сол, 1/8 лажиче црн пипер, ¼ лажиче мајоран, 2 лажици путер, ¼ шолја брашно, 1 лажица исечкан магдонос.

Се ставаат компирите, морковот, целерот и празот во студена супа, се посолуваат, се става црниот пипер и мајоранот. Се остава да проврие, па се вари на тивко, додека компирите и зеленчукот не омекнат.

Се процедува супата во друг лонец, компирите и зеленчукот се пасираат и се враќаат во процедената супа. Се прави румена запршка од путер и брашно и се разредува во студена вода. Потоа се става супата да се вари десетина минути. На крајот, се додава магдонос и се служи.

КИНЕСКА ЧОРБА ОД ЗЕЛЕНЧУК

1 лажица маслиново масло или 30 грама маст, 60 грама печурки исечени на ливчиња, 120 грама спанаќ или зелена салата или грашок, 5 дл. вода, сол, црн пипер.

Се загрева маслото или маста, се спуштаат печурките и се динстаат околу 5 минути. Се става исчистениот и исечен зеленчук и се остава така уште пет минути. Се налева со вода, се посолува, се става црн пипер и се вари на тивко десетина минути.

АМЕРИКАНСКА ФАРМЕРСКА ЧОРБА

1 шолја бел грав, 3,5 литри вода, 70 грама сланина исечена на коцкички, 2 поголеми главички ситно исечен кромид, 1 чешне лук, 1 исечена бабура, 1 шолја ситно исечен домат, 1 морков, 1 поголема тиквичка, 1 шолја целер исечен на коцкички, 1 шолја исечкана зелка, 1 лажица ситно исечен магдонос, ½ ловоров лист, сол, црн пипер.

Истребениот и измиен грав, се потопува во вода и се остава да отстои преку ноќта. Наредниот ден се истура таа вода и се става друга во која се вари околу два часа, или додека гравот не омекне. Варениот грав се процедува и се пасира а водата се зачувува. Во меѓувреме се истопува сланината во лонец за супа, се вадат џимиринките со дупчеста лажица, па во добиената маса се пропржува лукот бабурата и доматите. Се налева зеленчукот со водата во која се варел гравот, се додава пасираниот грав, џимиринките и целиот друг зеленчук и ароматичните растенија и се вари два часа, на тивко. Се вадат тиквичките и морковот, се пасираат и се враќаат во лонецот. Се посолува, се става црн пипер и се служи.

УНГАРСКА ЧОРБА ОД КИСЕЛА ЗЕЛКА

1 главица кисела зелка исечена на помали парчиња, 1 лажица маст, ½ лажиче брашно, 1 мала главица ситно исечен кромид, 1 лажиче црвен пипер, 200 грама колбаси исечени на тркалца, сол, црн пипер, 1 шолја кисела павлака.

Се става киселата зелка во лонец, се налева со вода и се вари додека не омекне. Ако водата во која се варела е премногу кисела, се разблажува со обична вода.

Се прави запршка од маст и брашно, се запржува во неа кромидот и се става црвена пипер. Се разредува запршката со вода и се става киселата зелка. Се додаваат колбасите и се вари на тивко десетина минути. Киселата павлака се служи посебно.

ШКОТСКА ПИЛЕШКА ЧОРБА СО ПРАЗ

1 кокошка, 2 лажичиња сол, ½ лажиче црн пипер, 6 страка праз исечен на тркалца, 1 ½ шолја наполу сварен ориз.

Исчистеното и измиено пилешко, се сече на делови, се става во лонец, се налева со вода и се вари 1 час. Се посолува, му се става црн пипер и се вари се додека не омекне. Вареното пилешко месо се вади и се држи на топло место, а во супата се става празот и оризот и се вари 25 минути. Се враќа пилешкото месо, сосема исчистено од коски и се вари уште пет минути. Оваа вкусна богата чорба е доволна за цел оброк.

МИЛАНСКА ГУСТА ЧОРБА

1 парче целер, 2 моркова, 2 домата(или лажица сос од домати), ½ главица кромид, 1 праз, китка магдонос, 50 грама сланина, 100 грама конзервирана боранија, ¼ карфиол, 150 грама ориз, 75 грама рендан пармезан.

Целерот и морковот исечете го на коцкички, доматите на резанки, кромидот и празот на парчиња и сето ова ставете го во сад. Многу ситно исечете го магдоносот и сланината, додадете ги на останатиот зеленчук, налејте еден ипол литар вода и оставете го сето ова да врие два часа на умерен оган. Тогаш додадете ја боранијата и на парчиња исечениот карфиол. Десетина минути подоцна, ставете го исчистениот ориз и варете го сето ова 12-15 минути. Посолете. Кога чорбата е готова, зачините ја со половина од предвидената количина пармезан, а другата послужете ја одделно. Чорбата може да се јаде врела, млака, па дури и студена.

Share.

About Author

Остави коментар

Powered by themekiller.com